BAYRISCHE LYRIK VON HERMANN BAUER
De bläde Fast'nzeit
An Ranz'n hob i beinand'
Es is a wahre Schand
Sogor zum Schuabandlbind'n
muass i mi obschind'n
Do kummt ma de Fast'nzeit grod recht
I denk ma, des is ned schlecht
D's Bier bleibt im Keller
Dann gehts Abnehma schneller
Bläd is', wenn i vorm Fernseher hock
und sieg de Weabung von Bier und Bock
Dann denk a ma, oa Bier war jetz' guad
I brich mein Vorsatz, danoch hob i a Wuat
Bläd is', wenn da Sepp vorbeikimmt
und an Ries'n Durscht mitbringt
Er sogt: A poor Bier macha nix aus
Aber 's G'wicht geht wieder nauf
Bläd is', wenn i auf a Geburtstagsfeier bin
Dann denk a ma, i glaab i spinn
Alle schlemma und saufa Wein und Sekt
Und i wer' mit mei'm Mineralwasser dableckt
Bläd is', wenn i im Biergarten bin
Und in mei'm Kruag is blos a Apfesaft drin
Dea schaugt zwar aus wia a Bier
Blos so richtig bsuffa werst da nia
Schee is', wenn de Weihnachtszeit kummt
Dann san ma ausnahmsweis Lebkuacha vagunnt
Obnehma konn ma ja wieder in da Fast'nzeit
Aber bis dahin is no so weit
Da Hans von Graxnstoa
Da Hans von Graxnstoa
Der is jetz ganz aloa
Sei Resi hod da Buidog zamg'fahrn
Jetz hod a an Hass auf jed'n Karr'n
Am Hanse is sei Haisl abbrennt
Damois is a um sei Leb'n g'rennt
Da Stoi is eam Gott sei Dank no blie'm
Da Pfarra hod g'sagt: Hans, des is ned so schlimm
Am Hans is vareckt sei beste Kua
Da Deifi gibt einfach koa Ruah
Wia lang soi des Pech no dauern
An jed'm Eck duad 's Unglück lauern
Da Hanse hod se an Hax'n brocha
Jetz kummt a mit de Kruck'n daherkrocha
Im Wirtshaus trinkt a auf bessere Zeit'n
Und tramt von am Hof und Pferdl zum reit'n
Da Hans spuit jetz Lotto
Er sogt: Des is bessa ois Toto
Ea mecht an Haufa Geid g'winna
D' Leit sog'n: Jetz duad a spinna
Da Hans is wirkle a arme Sau
Sei Hoor is scho ganz grau
Sei Leb'n werd boid vorbei sei'
Dann muass a in de Hoizkist'n nei
Da Schorsch und da Sepp
Da Schorsch, a Beamta aus Minga
Mei, hod der gepflegte Finga
Zum awad'n hod a zwoa linke Händ'
Drum hockt a im Büro rum und pennt
Da Sepp, dea awad auf 'm Bau
Danach schaugt a imma aus wia a Sau
Der arme Hund muass se wirkle plong
O'ms um zehne braugst den nix mehr frong
Im Winta fahrt da Schorsch nei in de Äup'n
Und tobt se aus in da Langlaufloip'n
Ea schind se ab, der dumme Mo
Dass a auf d' Nacht nix mehr o'stoin ko
Ganz andas is beim Sepp
Der sogt se, i bin doch koa Depp
Dea lasst im Urlaub olle Viere grod sei
Bloss zum abkühl'n schpringt a ins Meer nei
Mancha, dea se 's ganze Johr von da Awad druckt
Dea weagld in de Ferien wia varruckt
Da Weagla dageng boizt se liaba mit sei'm Wei
Und lasst an Herrgott an guad'n Mo sei
Jetz spinnt a ganz
Früher war a im Urlaub auf da Benedikt'nwand
A Bundhos'n war sei typisch' Gwand
Nächst's Johr mecht a a Kreizfahrt macha
Des is doch zum Lacha
Ja, ja, da Hans, jetz spinnt a ganz
Früher hod a zur Brotzeit an Leberkas gess'n
Des konnst heid bei eam vagess'n
Heid muass Hummer und Kaviar sei
Seine Klamott'n san vom Mooshamma und imma nei
Ja, ja, da Hans, jetz spinnt a ganz
Früher is a mit 'm Käfer rumg'fahr'n
Heid braucht a an Porsche-Karr'n
Damois hod a no zur Miete g'haust
Heid hod a a Kitschvilla, mir graust 's
Ja, ja, da Hans, jetz spinnt a ganz
Früher war a ehrlich, zünftig und immer froh
Jetz macht a Karriere, wer ko der ko
Er geht über Leichen, Hauptsach 's Diredare stimmt
De Quittung, de kriagt a bestimmt
Ja, ja, da Hans, jetz spinnt a ganz
Sei Resi is eam jetz nimma guat gnua
Er mecht d' Scheidung und gibt koa Ruah
Des junge Gmias, des is eam jetz liaba
Dea äude Depp macht Sachan, mei liaba Schiaba
Ja, ja, da Hans, jetz spinnt a ganz
Des Haufa Geid hod da Hans ned g'wunna
De Staatsanwaltschaft is eam draufkumma
War a blos bescheid'n und ehrlich blie'm
Jetz kockt da Hans im G'fängnis drin
Ja, ja, da Hans, ja, ja, da Hans ...